„Hello Kitty“ – „hello creschieu“

El: „Eau crajaiva adüna cha saja il problem dals homens cha nu dvaintan mê creschieus, cha guardan auncha cun quaraunta Trickfilms e cha sunan bass in bands da rock fin cha sun grischs! Ma las duonnas nu sun bger megldras, faun partys per guarder insembel ‚Germanys Next Top Model’. Duonnas creschidas guardan da quellas emischiuns chi sun fattas per mattas da 15 ans. E lura lur abitaziuns, sömmis in rösa!“
Ella guarda intuorn in si’abitaziun, ella ho be co e lo qualchosa rösa, que saro bain auncha permis.
El disch: „Hej e ‚Hello Kitty’ quel giattin chi’d es sü dapertuot, sün risplis, etuis, telefonins, chotschas suot, stinvs, tuottas haun ‚Hello Kitty’, la poppina da 3 mais e la duonna da 30 ans!“
„Mhm.“ Disch ella e sto sü per ir per ün magöl vin. Que nun es uschè simpel dad ir in chadafö sainza ch’el vezza che chi’d es sü sün sias chotschas da pigiama. „Hello Kitty“ esa scrit cun grands custabs rösa e que eir auncha sül chül! Ma che dess’la be fer? A NU DAIVA ÜNGÜNAS OTRAS CHOTSCHAS DA PIGIAMA!