WG puspè

Il biro grond è in pau sco ina gronda WG. La differenza è mo ch’ils differents cunabitants n’han nagin’atgna stanza, ma be in pult. In pult che n’è gnanc persunal. Il biro grond è damai plitost insatge sco ina gronda communa; ina giada prend’ins l’in pult, ina giada l’auter. Il sulet ch’è persunal è il pled clav ed il caddy, quel charret che nus avain e nua che jau hai in puff sgarschaivel. Ma jau na riv simplamain betg da far urden, insatge en mai sa dosta cunter far urden en biro. Per midar giu dovr jau però urden a chasa. Il pli gugent uschè pauc plunder sco pussaivel. Ed enfin avant curt temp hai jau pensà che jau na dovria era nagin’autra glieud a chasa, en mi’abitaziun.
Suenter onns da star en WGs hai jau ditg: «WG mai pli.» U lura pir puspè cun in um ch’è dapli che mo in «Mitbewohner». Mai pli WG, hai jau pensà e dapli che jau hai pensà quai, hai jau stuì dumandar mamezza, pertge uschè radical? A tut quai ch’ins di radicalmain da «na», quai è bain ina sfida. Ina nova sfida, quai fiss insatge e svelt hai jau decidì «gea, jau vi, jau vi puspè star en ina WG.»
Dapi questa decisiun è tut ì magari spert, jau hai tschertgà e chattà ina WG, vul dir in cunabitant ed in’abitaziun e bainbaud fatsch jau midada. «Quai vegn super», di mes futur cunabitant. «Gea, quai vegn super», repet jau e tegn ils poleschs. Tgi sa, sche quai funcziuna? Ina WG al lieu da lavur ed ina WG a chasa?